ఎక్కడ విజ్ఞానం స్వార్థపరుల చేతులలో నలిగిపోదో ఎక్కడ నిత్యం అభద్రత భావం తలెత్తదో  ఎక్కడ శ్రమ బానిసత్వంగా మార్పుచేందదో  ఎక్కడ అధికారం అహంకారగా మారదో ఎక్కడ మనిషి మనసు స్వేచ్ఛగా మనగలుగుతుందో  ఎక్కడ మనిషి మనిషిగా గౌరవించబడతాడో ఎక్కడ భావాలు నిర్భయంగా వ్యక్తపరచాగలుగుతామో  ఎక్కడ పరుల కన్నీరుతో పన్నీరు జల్లుకోరో  ఎక్కడ ప్రేమ కామంగా వ్యవహరించబడదో  ఎక్కడ నమ్మకం మోసానికి బలైపోదో  ఎక్కడ స్నేహం ముసుగుగా వాడుకోబడదో  ఎక్కడ స్వేచ్ఛ ఖైదు చేయబడదో  ఎక్కడ కుట్రలు కుతంత్రాలు రాజ్యమేలవో  ఎక్కడ ప్రశాంతత పరిఢవిల్లుతుందో  ఎక్కడ ప్రేమ అనంతవాహినిగా ప్రవహిస్తుందో  ఎక్కడ సంతోషం జడివానల తడిపేస్తుందో అక్కడికి ఆ మరో ప్రపంచానికి నన్ను తీసుకుపో మిత్రమా....

నీ పేరేదో ధ్వనించు శబ్దమే చాలు  నీ పైనుంచి వ్యాపించు గాలైన చాలు  నీ మృదుకరములు తాకించు స్పర్శైతే చాలు నుదుటినే ఉదయించి సూర్య బింబము చాలు కటిక చీకటికి మేటి నీ కంటి కాటుక చాలు రవివర్మ కుంచెకు జాలువారిన బొమ్మ చూస్తేనే చాలు రేయిలో హాయిగా తీయని కలవైతే చాలు  కడవరకు విడువక తోడుండు కోరికే లేదు  నేనెలా కోరేది ఆ గొప్ప వరము నీ జడపూజ పువ్వునైతే చాలు  నీ చిరునవ్వు చిందించు అధరాలు చిలికించు మధుర సుధలను చూడు చెక్కిళ్లపై చుక్కనైతే చాలు కనులకే కనిపించు కవ్వించు కవితలే రాయించు శక్తివే నువ్వు...

ఓ ఓటరు రాజకీయ వ్యూహాలు కమ్ముకున్నాయి త్వరపడు  విరుచుకుపడు రాజకీయ రాక్షసులకు  ఓటనే బ్రహ్మాస్త్రం సంధించు తిరుగులేని ఓటమినే చూపించు మాటల గారడీలకు బుద్ధిచెప్పు నోటుకు ముడివెయ్యకు ఓటును కులానికో మతానికో లొంగకు రేపటి భవితకు ఓటే ఓ రూటని మరువకు నాయకుడంటే రేపటి తరానికి తలరాతని తలపూంచు  మారని బతుకులు తీరని కష్టాలు గుర్తించు వివేకాన్ని చూపించు విచక్షణతో ఓటేయు...

నా ఓటు కలల సహకారానికి నవ సమాజ నిర్మాణానికి నా ఓటు సమానత్వానికి హక్కుల సాధికారానికి నా ఓటు అభివృద్ధికి అమ్ముడు పోనీ వ్యక్తిత్వానికి నా ఓటు పేదల కన్నీటిని తుడిచే చేతికి కష్ట కాలంలో వెన్నంటి నిలిచిన ధైర్యానికి నా ఓటు నా తరువాత తరాలకి తలవంచని ఆత్మగౌరవానికి  నా ఓటు నియంతలకు గొడ్డలి పెట్టు నా ఓటే నా స్వరం వినిపిస్తాను సమరశంఖమై రాజకీయ కురుక్షేత్ర సంగ్రామంలో...