క్షమించమ్మ

నీలోనే పుట్టాను నీలోనే పెరిగాను

వేటనే జీవనాధారంగా చేసి ముందుకు నడిచాను

ఆకలేసినప్పుడల్లా జీవాలను జిహ్వానికి బలి చేశాను

ఎండ సెగలు వంటికి సోకగానే చెట్టు కొమ్మలని

ముక్కలై గుడిసెలై నిలిచేలా చేశాను

అడుగుపెట్టిన చోటల్లా నవీనత అంటూ

నీ అందాని బద్దలు కొట్టాను

నీలో ఉన్న ధర్మాలను ఒక్కొక్కటి నేర్చుకున్నాను అని అనుకున్నాను

నిప్పు పుట్టించాను నాగరికతను రగిలించాను

చీకటనే అజ్ఞానాన్ని వదిలి కాంతి మార్గాన ప్రయాణం ఆరంభించానని అనుకున్నాను

కదిలే కాలానికి చక్రాలను కట్టి ముందుకు నడిపాను

జోరు పెరిగింది చక్రాలు యంత్రాలై ముందుకు నడిచాయి

వేగానికి తోడుగా పొగ గొట్టాలను

నీ ఊపిరితిత్తులకు బిగించాను

ప్రాణాలు నిలిపే ప్రాణవాయువు ప్రాణాలనే హరించాను

రసాయనాలు తీసి నీ ఒంటి నిండా చల్లాను

నీ చర్మానికి తూట్లు పొడిచారు

నీపై గడ్డి కూడా మొలవనీయక అణ్వస్త్రాలు ప్రయోగించాను

అధికారం అగ్రస్థానం అనే వాటికోసం

నిరంతర యుద్ధాలు చేశాను

నిన్ను వెచ్చని నెత్తుటితో స్నానం ఆడించాను

నాకంటే ముందు పుట్టి ఈ ప్రకృతిలో భాగమైన ఎన్నో జీవరాసులను ఒక్కొక్కటిగా నిర్మూలించాను

తప్పని చెప్పక నా బిడ్డ భవిష్యత్తు

అంటూ మౌనంగా ఉండిపోయావు

ప్రశ్నించని ఆ మౌనమే నేడు రోగమై నన్ను చుట్టూ ముట్టింది

సమాధానం లేని ఎన్నో తప్పులు ప్రశ్నగా

నిలిచి నిత్యం వేధిస్తూనే ఉన్నాయి

గడపదాటి అడుగు తీసి బయటకు వెయ్యటానికి

కూడా ధైర్యం చాలని పిరికివాడిని అయిపోయాను

నీ ముందు మోకరిల్లి తప్పు చేశానని ఒప్పుకున్నా

సరిపోదేమో నేను చేసిన పనులకి.....!

-- అప్పలరెడ్డి